Яндекс Go сервистері Ресейдің Владимир қаласындағы деректер орталығына жасалған шабуыл туралы хабарлардан кейін Қазақстанда қолжетімсіз болды.
Компанияның баспасөз қызметі қазіргі кезде сервис жұмысы қателермен іске қосылып жатқанын немесе уақытша мүлде қолжетімсіз болуы мүмкін екенін мәлімдеді. Онда бұл жағдай көптеген адамның күнделікті жоспарына әсер еткені, ал жүргізушілер мен курьерлер үшін әдеттегі режимде жұмысын жалғастыру мүмкін болмай қалғаны айтылды.
Яндекс Go өкілдері техникалық мамандар сервистерді қалпына келтірумен айналысып жатқанын жеткізді. Компания әзірге нақты мерзім айта алмайтынын, бірақ қызметтерді мүмкіндігінше тезірек іске қосу үшін барлық шараны жасап жатқанын хабарлады.
Компания сондай-ақ жағдай цифрлық инфрақұрылым мен жеке деректерді қорғауға қатысты сұрақтар туындатуы мүмкін екенін мойындады. Баспасөз қызметінің түсіндіруінше, Қазақстандағы пайдаланушылардың жеке деректері ел аумағындағы және Қазақстан заңнамасына сай қорғалған серверлерде сақталады.
Сонымен бірге цифрлық сервистердің жұмысы үшін әр елдегі серверлерге таралған есептеу инфрақұрылымы қолданылады. Сондықтан бір компоненттегі техникалық ақау бірнеше елдегі қызметтердің қолжетімділігіне әсер етуі мүмкін.
Компания қызметтердің қалпына келтірілуі туралы пайдаланушыларды, жүргізушілерді және курьерлерді ресми арналар арқылы хабардар ететінін айтты.
11 қазан күні таңертең Ресейдің БАҚ-тары Владимирдегі «Яндекс» деректер орталығы БПЛА шабуылынан кейін толық тоқтағанын хабарлаған. Оған дейін Yandex Cloud бұлтты платформасының қолжетімділік аймағында электр қуатының үзілуі болғаны белгілі болды.
